Skráseting av rossum í WorldFengur

Tá tú keypir tær eitt íslandsross er umráðandi at fáa rossið skrásett rætt í WorldFengur. Rossið skal umskrásetast soleiðis, at tað stendur í tínum navni.

WorldFengur er ein online datagrunnur og ættanbók fyri íslendsk ross í FEIF limalondunum. Í datagrunninum er kunning at finna um skrásettu rossini og eigarar teirra.

Tað er umráðandi at rossið er rætt skrásett og stendur í navninum á rætta eigaranum. Er rossið til dømis skrásett í navninum hjá undanfarna eigaranum, so kunnu tvístøður stiga seg upp um ognarskapin av rossinum. Er rossið enn ikki skrásett í datagrunninum, so er eftir røttum ikki loyvt at kappast á tí eins og tað kann gerast torført at selja ross, ið ikki eru skrásett.

Hevur mann áhuga fyri at kappast uttanlands, so skal mann eisini útvega rossinum eitt rossapass. Tað sama ger seg galdandi um ross skulu seljast av landinum.

Vit mæla tær tí til at tryggja, at ross títt eru skrásett rætt í WorldFengur, tí tá stendur tú tryggari og hevur fleiri møguleikar við rossinum.

Kostnaðirnir fyri at skráseta ross í WorldFengur eru:
Fyl upp til 1 ár - kr. 150
Ross eldri enn 1 ár kr. 300
Eigaraskiftir kr. 100
Pass til Ross kr. 600
GG: Í samband við skrásetingar og broytingar skal kvittan sendast saman við upplýsingunum.

Limir hjá Føroyskum Íslandsrossafelagi hava fram til nú havt fría atgongd til WorldFengur. Frá 2016 av verður hetta broytt soleiðis, at limir skulu rinda kr. 100 um árið fyri hava atgongd til WorldFengur.

Eru ivamál ella spurningar í samband við WorldFengur, so er tit vælkomin at venda tykkum til ein av okkum í Alinevndini.

Vinarliga heilsan,
Alinevndin